Hobe ezazu zure euskara Epaibarreko Pilulak ataleko eduki berriekin Nola da euskaraz “Administración Pública”? Zein da zuzena, “Europako Parlamentua” edo “Legebiltzarra”?

2019-09-26 Auzia Euskaraz!

Badakizu Epaibar tresnak zure euskara hobetzen laguntzeko gomendio linguistikoak biltzen dituela? Gaur egun, 2.000 eduki baino gehiago ditu “Pilulak” izeneko atalak, eta, gainera, bilaketak egin daitezke bertan.


Epaibarreko edukiak eguneratu ditugu; esaldi edo hitz bat modu egokian idazteko edo erabiltzeko gomendio gehiago daude orain, bai eta hitz edo esaldi bat ez erabiltzeko gomendioak ere.

Uztailean, hitz berri eta argibide gehiago txertatu dira Epaibarreko “Pilulak” izeneko atalean, eta dagoeneko kontsulta daitezke 1.000 pilula berri, pixkanaka-pixkanaka eta fase ezberdinetan txertatu direnak.


Zer bildu zen lehenengo fasean? Bada, IZOk, hau da, Eusko Jaurlaritzako Itzultzaile Zerbitzu Ofizialak, itzultzaileen eta zuzentzaileen lana ahalik eta erarik koherenteenean gauzatzeko argitaratu dituen irizpideak. Itzulpenak egokiak eta kalitatezkoak izateko erabakiak eta gomendioak biltzen dira bertan. Zehazki, IZOren itzultzaile-enpresa hornitzaileei daude bideratuta, baina oso baliagarriak dira euskara juridikoaren erabiltzaile ororentzat ere.

Bigarren fasean, ordea, Euskaltzaindiak joan den urtean argitaratu zuen Euskara Batuaren Eskuliburua (EBE) hartu da oinarritzat. Bigarren fase hori, aldi berean, bi etapatan banatu da:

- Lehenengo etapan, batetik, euskaraz zalantza eragiten duten zenbait hitz txertatu dira –Hrekin edo Hrik gabe, TS edo TZ, S edo Z...–, eta, bestetik, arazotsu gertatzen diren arauen kontrako izen berezi batzuk ere jaso dira –esate baterako, herri izenak–. Fase hori izan da guztietan luzeena; izan ere, gomendio eta aholku ugari eta baliagarri bistaratzen dira bertan.


- Azkenik, bigarren etapan, Euskara Batuaren Eskuliburuan jasotako kalko oker nabarmenak txertatu dira, hau da, beste hizkuntza batetik zuzenean mailegaturiko hitz edo esamolde okerrak. Esate baterako, hainbat testuingurutan hitz edo esaldien erabilera okerra –“asko” eta “gehiegi”, “froga” eta “proba”, “dagoeneko” eta “honezkero”–, hainbat atzizkiren erabilera okerra –“-ar”, “-ztar”, “-tik”–, sinonimotzat oker hartzen den zenbat hitz –esaterako, “bera” eta “berdina”– eta “erdarakada” gisa hartzen diren hitz batzuk, hau da, gaztelania edo frantsesaren eraginez hitzez hitzeko itzulpenak. Gainera, azken etapa horretan, aditz batzuen jokaera okerrari lotutako pilula batzuk ere gehitu dira –esate baterako, “joan” edo “izan”–, bai eta pasiboaren eta zehar-galderen erabilera okerrak ere.

Gogoan izan: bilatzen duzuna aurkitzen ez baduzu edo zure zalantza linguistikoa argitzerik izan ez baduzu, erabili Epaibarreko “Galdetu” atala, eta bidali zure galdera.

Eta, ez ahaztu: edozein zalantza argitzeko, epaibi@justizia.eus helbidera ere idatz dezakezu!

Nabarmen handituko da izen neutroen zerrenda

2019-07-03 Auzia Euskaraz!

Pertsona izendegian berrikuntza handia egin du Euskaltzaindiak: lehen aldiz, izen neutroen zerrenda egin du. Ikusmina eragin du aldaketak. Bide baten hasiera da, Onomastika Batzordeko buru Roberto Gonzalez de Viñasprek (Bilbo, 1961) nabarmendu duenez.

'Jada eman ditugu ziurtagiriak erregistro zibiletara, izenek bi sexuetarako balio dutela' Izen neutro edo epizenoak hizpide, elkarrizketa Euskaltzaindiko Onomastika batzordeko buru Roberto Glez. de Viñaspreri Berria egunkarian.

Justizia Administrazioko lan-kontratudun langileen eta langile transferituen euskara-ikastaroen deialdi orokorra 2019/2020 argitaratu da

2019-05-16 Auzia Euskaraz!

Justizia Administrazioko lan-kontratudun langileen eta langile transferituen euskara-ikastaroen 2019/2020 deialdi orokorra.


Euskal Autonomia Erkidegoan diharduten Justizia Administrazioko funtzionarioentzat
prestatu den euskalduntze- eta alfabetatze-programaren helburua euskarazko hizkuntzagaikuntza
sustatzea eta bultzatzea da. Programa horren barruan, Lan eta Justizia Saileko
Justizia Administrazioko Zuzendaritzak honako eskaintza egingo du 2019/2020
ikasturterako, hizkuntza-normalkuntzari buruzko 174/2010 Dekretuari jarraiki.

Era berean, Euskal Autonomia Erkidegoan diharduten Justizia Administrazioko lan-kontratudun
langileentzat prestatu den euskalduntze- eta alfabetatze-programaren helburua euskarazko
hizkuntza-gaikuntza sustatzea eta bultzatzea da.

Deialdi orokor hauek 2019/2020 ikasturte osoa hartuko dute. Azaroan deialdi osagarri bat
egingo da, batez ere deialdi orokor honetan izena eman ezin izan dutenentzat, beti ere
aurrekontu aurreikuspenen arabera.


Eskabideak aurkezteko epea maiatzaren 24an, egun hori barne, amaituko da.

Informazio guztia ikusteko Justizia.eus-eko intranetera jo dezakezu (justiziako sarean ikusgai).

Hemen da 21. Korrika!

2019-04-04 Auzia Euskaraz!

Klika” leloa aukeratu du AEK-k aurtengo Korrikarako. 21. edizioa izango da eta apirilaren 4tik 14ra bitartean zeharkatuko du Euskal Herria, Garesen hasi eta Gasteizen bukatu. Jose Luis Alvarez Enparantza “Txillardegi” omenduko du euskararen aldeko lasterketak, kulturan, euskalgintzan eta pentsamenduaren alorrean egin zituen ekarpenengatik.

www.korrika.eus webgunean une oro Korrika nola doan zuzenean ikusteko aukera egongo da. Gainera, Garesko eta Gasteizko ekitaldiak zuzenean izango dira, euskarazko hedabideen elkarlanari esker. Horrez gain, hainbat hedabidek etengabeko jarraipena egingo dute: 19:00etan, 20:00etan, 21:00etan eta 21:15etan eguneroko saioak egongo dira Kanalduden, BERRIA Tbn, Hamaika Telebistan eta ETB1en.

www.korrika.eus

Bestalde, KORRIKAren bideoak webgunean nahiz hedabideen atarietan aurkitzeko aukera egongo da.

Hau da aurtengo Korrikaren mezua:

Klika egitea aukera bat hartzea da, euskararen aukera hartzea, hautua egitea
Hautua da euskara ikastea, erabiltzea, inplikatzea, jauzia ematea. Klika egitea da euskaraz ahalduntzea, euskaltegietan matrikulatzea.
Klika da herritar guztien hizkuntza eskubideak bermatzeko neurriak hartzea. Konpromisoak hartzeko garaia da.
Klika garai berri bati, kulturari, gure hizkuntzari. Egin klik begiak ondo irekita. Hartu arnasa sakon, euskal inguruneari begiratu, eta klik egin bizitzeko, aske izateko, euskara aukeratzeko. Egin klik, ikimilikiliklik! AEK-k euskara du gizarte berri baten ardatz, eta mundu horretarako zu aukeratu zaitu, zugan klikaturik. Klika, etorkizunera salto egiteko. Klika Korrika.
Klik eginez iziotzen ditugu hizkuntzaren argiak, doinuak, ahogozoak; klika da euskal musika-txaranga, eta klikatuz asetzen dugu euskara-klika, euskara-egarria, euskara-gosea.
Euskarak hurrengo fasea klikatu du: akzioarena, konpromisoarena; euskara unibertsal bihurtuko dugu, eta klik eginen du denon zeruan. Euskal Herriak hartu du euskararekiko kontzientzia, sortu du euskal komunitatea. Euskararen aroan gaude; orain da unea: etorri euskarara, aktibatu, erabakiak hartu, klik egin, euskaraz egin.

Zabalik online euskara ikastaroetan izena emateko epea

2019/02/04 Auzia Euskaraz!

Justizia Administrazioko langileak, Karrera Judizialeko kideak, Justizia Administrazioaren Letraduak eta Fiskalak, eta bake epaileak euskara online ikasteko deialdia argitaratu da.

Izena emateko epea: 2019ko otsailaren 18ra arte.

Informazio gehiago Justizia.eus atariko intranetean.