“Amore eman”, “uko egin” eta “atzera egin” ez dira gauza bera

Amore emate = allanamiento

Uko egite = renuncia

Atzera egite = desistimiento

Kontuan izan erdarazko “desistimiento” emateko ez dela egokitzat jotzen “utziespen”. Horren ordez, “atzera egite” esapidea hobesten da.

Zer esanahi dute esapide hauek zuzenbide prozesal zibilean?

AMORE EMATE PROZESALA: Demandatua demandatzailearen eskaerarekin bat datorrela adierazten duen egintza prozesala. Arrazoi materialetan oinarrituta, prozesua modu ezohikoan bukatzeko moduetako bat da. Kondena-epai bidez adierazten da, eta gauza epaituaren efektua du.

UKO EGITE PROZESALA:  Demandatzailearen egintza prozesala, demandatzaileak berak egikaritutako akzioa edo bere uziaren oinarri den eskubidea alde batera uzten duela adieraztekoa. Arrazoi materialetan oinarrituta, prozesua modu ezohikoan bukatzeko moduetako bat da. Gauza epaituaren efektua sortzen du.

ATZERA EGITE PROZESALA: Demandatzailearen egintza prozesala, demandatzaileak berak hasitako prozesua uzteko borondatea adieraztekoa. Arrazoi prozesaletan oinarrituta, prozesua modu ezohikoan bukatzeko moduetako bat da. Uzia epaitu gabe geratzen da.

Adibide batzuk:

• Ohartaraz bekio zordunari ezen, ikustaldian agertzen ez bada, aurkakotzan atzera egin duela ulertuko dela.

•  Aipatzekoa da 13 kasutan salatzaileak berak egin diola uko babes-aginduari.

•   Auzi-iheslari izateak ez du esan nahi demandaren aurrean amore eman denik ez eta demandaren oinarri diren egitateak egiatzat jotzen direnik ere

Iturria: EUSKALTERM  

Pilula guztiak ikusi