2013-03-04

Inpertsonalak ala pertsonalak?



Inpertsonala: Aditzera ematen ZAIZU
Pertsonala: aditzera ematen DIZUGU

Goiko esaldia inpertsonala da, ez baitu zehazten nork egin duen ekintza (=nork eman duen aditzera); bigarrena, berriz, pertsonala da zehazten duelako ekintza nork egin duen (“guk” ematen dizugu aditzera).
Biak dira zuenak, izan ere, esaldi inpertsonalak gramatikalak dira, baina batzuetan ez dira aukera egokiena. IVAPen Estilo Liburuak honakoa dio inpertsonalei buruz:
AHAL DELA, UTZI AGERIAN EGILEA
Gaztelaniaz gaur egun joera handia dago egitura pasiboak eta inpertsonalak erabiltzeko. Eta baliagarri dira, gainera, egilea ezkutatu beharra dagoenean; esate baterako, Administrazioak badakienean hartzaileak ez duela gustuko izango mezua, edota lege bat idazterakoan.
Halere, herritarrari idazten zaionean komeni da, ahal den guztietan, egitura aktiboak erabiltzea, horrela argi gelditzen baita egilea zein den: 
Inpertsonala: Interesatuaren aldetik oinarriak ez betetzeak kobratu DIREN kopuruak osotara itzultzea sorraraziko DU.
Pertsonala: Oinarriak betetzen ez BADITU, bekadunak diru guztia itzuli beharko DU.
Inpertsonala: Jakinarazten DA 30 eguneko epea dutela interesdunek alegazioak egiteko.
Pertsonala: Jakinarazten DIZUT 30 egun dituzula alegazioak egiteko.

Berez aukerako kontu bat izan behar da forma inpertsonalak erabiliz idaztea, nahita albiste txar bat edo gatazka bat neutralizatu nahi dugunean baliatzekoa. Baina gure ohiko idazkietan, forma pertsonalak erabili beharko genituzke, izan ere, forma inpertsonalek iluntasuna eta urruntzea transmititzen dute, eta teorian, administrazioa herritarrarengana hurbiltzea nahi dugu.

Dena den, epaitegietan erabiltzen ditugun dokumentuetan egitura inpertsonalak ugariak dira; behekoa bezalako esaldi inpertsonalak ikusten eta idazten ditugu sarri:

        Inpertsonala: Idazki honen bidez zitazioa egiten ZAIZU epaitegi honetan ager zaitezen.
Pertsonala: Idazki honen bidez zitazioa egiten DIZUGU epaitegi honetan ager zaitezen.


iruzkinik ez:

Argitaratu iruzkina

Mila esker zure ekarpenagatik.