2016-04-04

Justizia Administrazioko ia 200 langilek hizkuntza eskakizunen bat egiaztatu beharko dute

2016/04/04 Auzia Euskaraz!

Euskal Herriko Agintaritzaren Aldizkarian gaur argitaratu da 2016ko martxoaren 11ko Agindua, Herri Administrazio eta Justiziako sailburuarena, Justizia Administrazioan hizkuntza dela-eta bereziturik dauden lanpostuak betetzeko berariazko lehiaketaren deialdia egiten duena. 

Xede nagusia da herritar guztiei 
euskara nahiz gaztelania erabiltzeko eskubidea bermatzea  Euskal Autonomia Erkidegoko herri-administrazioarekiko harremanetan. 

Agindu horretan, hizkuntzaren arabera bereziturik dauden plaza hutsak betetzeko berariazko lehiaketa iragartzen da. Lanpostu horiek I. eranskinean daude jasota, hizkuntza dela-eta bereziturik dauden lanpostuen zerrendan. 

Lehiaketan parte hartu ahal izango dute Prozesu eta Administrazio Kudeaketako, Prozesu eta Administrazio Izapidetzako eta Laguntza Judizialeko kidegoetako karrerako funtzionarioek, destinoa edozein lurralde-eremutan dutela ere; 199 lanpostu dira guztira: 63 izapidetzakoak,  83 kudeaketakoak, eta 53 laguntza judizialekoak. Hori bai, parte hartzen dutenek, eskabideak aurkezteko epea bukatzen denean, eskatutako lanpostuei dagokien hizkuntza-eskakizuna izan beharko dute.

Informazio guztia hemen.

iruzkinik ez:

Argitaratu iruzkina

Mila esker zure ekarpenagatik.